Inici

 

Lo XIIn Congrès de l’Associacion internacionala d’estudis occitans (A.I.E.O.) se debanarà del diluns 10 de julh al dissabte 15 de julh de 2017 as Albi.

Fondada en 1981 a Lièja (Belgica), l’Associacion Internacionala d’Estudis Occitans (A.I.E.O.) a per objectiu de favorizar e coordonar las recercas dins lo domeni dels estudis occitans. Tanben, sa vocacion es, en defòra de tota doctrina o tendéncia, de recampar totes los que se consacran a aquestas recercas dins lo mond entièr, que sián tanplan medievistas coma modernistas, lingüistas coma literaris, istorians, antropològs, musicològs…, e que considèren los problèmas de la lenga e de la literatura d’òc tanplan en se coma dins lors rapòrts amb l’environament cultural e social. L’Associacion es un luòc de rescontres e de dialògs entre de disciplinas que dependon de l’ensemble de las sciéncias umanas e socialas.

Las activitats de l’A.E.I.O. prenon uèi tres vias de desvolopament :

– l’organizacion de rescontres scientifics e de reünions de trabalh, e, es de notar, cada tres ans, l’organizacion d’un grand Congrès Internacional d’Estudis Occitans dins lo perlongament dels Congrèsses de Lenga e Literatura d’Òc que se tenguèron dempuèi 1955 dusca a 1981 ;

– la publicacion de trabalhs scientifics que pertòcan los estudis occitans ;

– lo regropament e la difusion d’informacions sus las recercas realizadas o que son a se realizar dins lo domeni dels estudis occitans.

L’Associacion es bailejada per un Conselh d’Administracion elegit per l’Amassada Generala que clava cada Congrès tercenal. Dempuèi 1981, lo Prof. Peter Ricketts (Reiaume-Unit, 1981-1990), lo Prof. Q.I.M. Mok, (Países Basses, 1990-1993), lo Prof. Georg Kremnitz (Àustria, 1993-2005) e lo Prof. Walter Meliga (Itàlia, 2005-2014) ne foguèron successivament los presidents.

Uèi sa presidenta es la Dòna Prof. Rosa Medina Granda (Universitat d’Oviedo, Espanha).

Dempuèi la fondacion de l’A.I.E.O. en 1981, los Congrèsses foguèron organizats a :

  • Southampton (Anglatèrra, 1984). Actes editats per Peter Ricketts
  • Turin (Itàlia 1987). Actes editats per Giuliano Gasca Queirazza
  • Montpelhièr (França, 1990). Actes editats per Gerard Gouiran
  • Vitoria-Gasteiz (Espanha, 1993). Actes editats per Ricardo Cierbide
  • Tolosa (França, 1996). Actes editats per Jacme Gourc e Francés Pic
  • Wien (Austria, 1999). Actes editats per Georg Kremnitz, Barbara Czernilowsky, Peter Cichon e Robert Tanzmeister
  • Reggio di Calabria e Messina (Itàlia, 2002). Actes editats per Rossana Castano, Saverio Guida e Fortunata Latella
  • Bordèu (França, 2005). Actes editats per Guiu Latry
  • Aachen (Allemanha, 2008). Actes editats per Angelica Rieger.
  • Besièrs (França, 2011). Actes editats per Carmen Alén Garabato, Clara Torreilles e Maria-Joana Verny
  • Lhèida (Espanha, 2014). Actes en cors d’edicion per Aitor Carrera